Hvaða land í Norður-Evrópu er bæði stærst og fjölmennast? En í Evrópu allri?

Svar

Það er ekki eitt og sama landið sem er bæði stærst og fjölmennast í Norður-Evrópu.

Á Wikipediu er sjálfstæð ríki Norður-Evrópu sögð vera 10 og þar stuðst við svæðaskipting frá Sameinuðu þjóðunum. Þau eru Norðurlöndin fimm: Danmörk, Finnland, Ísland, Noregur og Svíþjóð; Eystrasaltslöndin þrjú: Eistland, Lettland og Litháen, auk Bretlands og Írlands.

Af þessum 10 löndum er Bretland langfjölmennast en samkvæmt upplýsingum bresku hagstofunnar voru Bretar rétt tæplega 60 milljónir árið 2004. Næst á eftir Bretlandi koma Svíþjóð með rúmlega 9 milljónir íbúa (2006) og Danmörk með 5,4 milljónir (2006).

Svíþjóð er hins vegar stærsta land Norður-Evrópu að flatarmáli, alls 449.946 km². Finnland er í öðru sæti, 338.145 km² og Noregur í því þriðja, 324.220 km².




Ef Evrópa er skoðuð í heild er það þó Rússland sem er bæði stærst og fjölmennast. Rússland er reyndar stærsta land í heimi að flatarmáli og það áttunda fjölmennasta, en það tilheyrir bæði Evrópu og Asíu eins og lesa má um í svari við spurningunni Í hvaða heimsálfu er Rússland? Ekki tókst að finna nákvæmar upplýsingar um hvernig flatarmál og fólksfjöldi í Rússlandi skiptist á milli Evrópu og Asíu en engu að síður má ganga út frá því að ekkert annað Evrópuríki sé jafn fjölmennt og stórt og Evrópuhluti Rússlands.

Ef Rússland er ekki talið með, þar sem það skiptist á milli tveggja heimsálfa, þá er Þýskaland fjölmennasta Evrópuríkið með 82,5 milljónir íbúa í lok árs 2004, en flatarmál þess er um 357.000 km². Úkraína er hins vegar stærst Evrópulanda að Rússlandi undanskildu, um 603.700 km² að flatarmáli, en íbúar þess eru í kringum 46,7 milljónir.

Heimildir og kort:

• Northern Europe á en.wikipedia.org.
• National Statistics
• Danmarks Statistik
• Federal Statistical Office Germany
• University of Essex
• The World Factbook

---

Þetta svar er eftir nemanda í Háskóla unga fólksins, námskeiðum á vegum HÍ fyrir 12-16 ára ungmenni í júnímánuði 2006.