Hve þung er Fokker 50?

Svar

Fokker 50 er flugvél af gerð svokallaðra skrúfuþota og var í almennri framleiðslu frá árinu 1987 til 1996. Samkvæmt upplýsingum á síðu Wikipedia um vélina er þyngd vélarinnar frá framleiðanda, sem sagt án eldsneytis, farms og innréttinga sem ekki eru nauðsynlegar stjórn vélarinnar, um 12.520 kg. Hámarksþyngd hennar við flugtak, svo hún megi teljast flugfær, er ýmist nefnd sem 19.950 kg eða 20.820 kg, sem kann að skýrast af mismunandi framleiðslu eða stöðlum, og hámarksþyngd án eldsneytis 18.600 kg.

Fokker 50 sem Flugfélag Íslands notar.

Lengd vélarinnar er 25 m og vænghaf hennar 29 m. Meðalflughraði hennar er 450 km/klst. en mesti hraði sem hún hefur náð er 535 km/klst. Fokker 50 hefur aðeins um 2000 km flugþol og er því mest notuð í innanlandsflugi. Flugfélög um víða veröld notast við vélina; til dæmis voru 5 eintök í flota Flugfélags Íslands í mars 2012. Þá hefur hún líka verið notuð til herflutninga.

Flugvélar geta flogið meðal annars vegna sérstakrar lögunar vængsins. Hann er mótaður þannig að loftið fyrir ofan vænginn fer lengri leið en loftið undir honum, sem veldur því að undirþrýstingur myndast fyrir ofan vængina, sem lyftast þá upp og flugvélin með.

Antonov An-225 var hönnuð til að flytja geimför.

Fokker 50 virðist mjög lítil borin saman við tvær af stærstu flugvélum heims; herflutningavélina C-5 Galaxy, sem fullhlaðin vegur tæp 349 tonn og Antonov An-225 Mriya-vélarnar, sem vega heil 640 tonn fullhlaðnar.

Heimildir:

• Fokker 50 - Wikipedia, the free encyclopedia
• Flugfélag Íslands á Planespotters.net

Myndir:

• Baldur Sveinsson (Fyrst notuð með svari Einars Arnar Þorvaldssonar við spurningunni Hve hratt fer flugvélin Fokker 50?) Notuð með góðfúsulegu leyfi höfundarrétthafa.
• Antonov An-225 Mriya - Wikipedia, the free encyclopedia (Sótt 26.6.2012)

---

Þetta svar er eftir nemendur í Háskóla unga fólksins, námskeiðum á vegum HÍ fyrir 12-16 ára ungmenni í júnímánuði 2012.