Sólin
Rís 05:51 • sest 21:06
Tunglið
Rís 09:47 • Sest 06:52
Flóð
Árdegis: 00:02 • Síðdegis: 12:48
Fjara
Árdegis: 06:36 • Síðdegis: 18:53
Eins og önnur blóðkorn myndast blóðflögur í svokölluðum blóðmerg eða rauðum beinmerg. Á fósturskeiði er allur beinmergur rauður en þegar á ævina líður þokar hann fyrir gulum beinmerg eða svokölluðum fitumerg í flestum beinum líkamans. Í fullvaxta einstaklingum er blóðmerg aðeins að finna í flötum beinum eins og rifbeinum og höfuðkúpubeinum og einnig í köstum langra beina. Blóðflögur eru í raun kjarnalaus frumubrot sem myndast við það að umfrymi mjög stórra frumna í blóðmerg, svokallaðra blóðflögumæðra, kvarnast í sundur. Vöxtur og þroskun blóðflögumæðra er undir stjórn sykurprótíns sem myndast í lifur og að minna leyti í nýrum og mætti kalla blóðflöguvaka (thrombopoietin). Blóðflögumæður eru risastórar frumur sem myndast við það að fara í gegnum allt að sjöföldun kjarna og umfrymis án þess að skipting fylgi í kjölfarið. Þannig verða þær að risastórum frumum sem eru 50-100 míkrómetrar í þvermál með sepóttum kjarna sem inniheldur mörg eintök af erfðaefni (DNA). Blóðflögumæður hafa anga eða útskot sem klípast af miðhluta frumunnar og verða að blóðflögum sem eru um 3 míkrómetrar í þvermál. Þær berast í æðar í blóðmergnum og komast þannig í blóðrásina. Þetta þroskunarferli í blóðmerg tekur um 10 sólarhringa. Þegar út í blóðrásina er komið endast blóðflögur aðeins í 5-9 daga, enda ekki með kjarna til að stjórna starfsemi þeirra eins og fullgildar frumur. Blóðflögur eyðast í lifur og milta eins og önnur blóðkorn en á fósturskeiði sjá þessi líffæri, ásamt blóðmergi, um myndun þeirra. Við eyðingu koma átfrumur í milta og lifur við sögu. Þær innbyrða útjöskuðu blóðflögurnar í átbólur sem renna saman við leysibólur, en þær innihalda meltiensím. Við samruna þessara tveggja bóla myndast meltibóla og innan hennar sundrast blóðflagan. Nýtanleg efni úr henni eru nýtt af líkamanum en önnur berast með öðrum úrgangsefnum út úr líkamanum.
