Hvað er hægt að segja um Egyptaland?

Svar

Spurningin í heild sinni hljóðaði svona: Hver er fólksfjöldinn í Egyptalandi í dag? Hverjir eru helstu atvinnuvegir í landinu og hvernig er skipting mannafla milli greina? Hver er efnahagsstaða Egypta?

Samkvæmt nýlegum tölum búa rúmlega 70 milljónir manna í Egyptalandi. Flestir þeirra búa í Nílardalnum, við Nílarósa eða nálægt Súesskurðinum. Stærsti hluti Egyptalands er eyðimörk en Nílardalur er mjög frjósamur vegna framburðs úr fljótinu. Ræktanlegt land er ekki nema rúm 5% af flatarmáli Egyptalands.

Stærstu félagslegu vandamál Egypta eru flutningar fólks til borga, fátækt, atvinnuleysi og offjölgun. Egypska þjóðin vex um rúm 1,7% á ári eða meira en þrisvar sinnum hraðar en íslenska þjóðin. Um einn þriðji Egypta er yngri en fimmtán ára. Atvinnuleysi í Egyptalandi er rúmlega 11%.

Egyptar eru fátæk þjóð og starfa flestir þar við landbúnað, fiskveiði, þjónustu eða iðnað. Samkvæmt tölum frá CIA World Factbook eru um 29% þjóðarinnar bændur, 22% starfa við iðnað og 49% við þjónustu. Tæplega ¼ hluti egypsku þjóðarinnar hefur lágmarkstekjur.

Sósíalismi er við lýði í Egyptalandi. Ríkisstjórnin stýrir viðskiptum innanlands og öllum útflutningi og ræður verði á landbúnaðarvörum. Í Egyptalandi eru gerðar fimm ára áætlanir um allar fjárfestingar og félagslega þróun landsins. Landbúnaðarframleiðsla í Egyptalandi er mikil og hægt er að uppskera oftar en einu sinni ári. Engu að síður þurfa Egyptar að flytja mikið inn af matvörum, svo sem kartöflum, lauk og kornmeti.

Egyptar framleiða mikið af fatnaði og matvælum. Meðal náttúruauðlinda þar má nefna olíu, járn, kalkstein, gull og sink. Gas hefur einnig fundist þar. Egyptar flytja út vörur fyrir um 7 milljarða árlega, fyrst og fremst olíu, bómull, fatnað og málma. Innfluttar vörur kosta þá um 17 milljarða. Síðan seinni heimstyrjöldinni lauk hafa útflutningstekjur verið lægri en aðkeyptar vörur og til að vega upp á móti því hefur ríkisstjórn Egyptalands þurft að taka ýmis lán.


Heimildir

• Britannica
• CIA World Factbook
• Encarta

Mynd af Kaíró:
Semiramis Inter-Continental Cairo Mynd af Sfinxi: HB